Norðurlandameistaramótið í karate

apríl 11, 2024

María Helga Guðmundsdóttir

Norðurlandameistaramótið í karate fer fram í Laugardalshöllinni helgina 13.-14. apríl næstkomandi. Flestallt færasta karatefólk Íslands og Norðurlandanna er skráð til leiks. Keppt er í einstaklings- og liðakeppni bæði í kata og kumite í aldursflokkum fullorðinna, kadetta (14-15 ára) og juniora (16-17 ára).

Ísland teflir fram fjölmennu liði 30 keppenda, þar á meðal öllum ríkjandi Íslandsmeisturum fullorðinna í kata og kumite. Karen Thuy Duong Vu á Norðurlandameistaratitil að verja í kumite -48 kg junior-stúlkna. Auk hennar unnu bæði Eydís Magnea Friðriksdóttir og Davíð Steinn Einarsson til verðlauna í fyrra og verður spennandi að sjá frammistöðu þeirra, en Eydís keppir bæði í kata og -68 kg kumite kvenna og Davíð Steinn í kumite -76 kg junior-pilta. Hugi Halldórsson vann Norðurlandameistaratitil í kumite juniora árið 2021 en keppir nú í -84 kg flokki karla og verður spennandi að sjá hann etja kappi við marga af reyndustu mönnum Norðurlanda. Þá snýr Ólafur Engilbert Árnason aftur í landsliðið eftir nokkurra ára hlé og keppir í -75 kg karlaflokki. Ólafur býr og æfir í Danmörku og varð Danmerkurmeistari í flokki sínum í haust og er því til alls líklegur.

Búast má við spennandi keppni um Norðurlandameistaratitil þjóða að þessu sinni, en hann er veittur þeirri þjóð sem vinnur flest verðlaun á mótinu. Undanfarin ár hafa Danir einokað bikarinn og eiga met yfir flesta sigra í röð. Danir mæta að vanda með sterkt og fjölmennt lið til leiks en búast má við að Svíar veiti þeim harða samkeppni, með keppendur á borð við Agnesi Nyman, Mathildu Rosenlind, Önnu-Johönnu Nilsson, Anthony Vu og Ricky Haag í fararbroddi, en þau eru öll í efstu 30 sætum heimslista í sínum flokkum og hafa barist um verðlaun á álfu- og heimsbikarmótum undanfarin misseri.

Landslið Íslands skipa: